WALIWO akakundi ka bapaasita, baffaaza ne banaddiini ab’enzikiriza ez’enjawulo, nga singa Pulezidenti Museveni abeera avudde mu buyinza, nga bayinza obutasigala mu Uganda, ne baddukira ku mawanga, okubowa eby’obugagga byabwe oba okutwalibwa mu kkomera olw’ebikolobero bye bazze bakola, wabula olw’okuba bakooneramu Muzeeyi n’okukolagana ne seculite n’abanene mu gavumenti, bazze bababikkirira!
1. BUJJINGO ANADDA WA OBWANA BWA NUP?
Aloysious Bujjiingo nga ye Musumba omukulu ow’ekkanisa ya House of Prayers Ministries International-HPMI yasaba dda abagoberezi be bonna okwetoloola eggwanga okwebaza n’okukubira gavumenti ya pulezidenti Museveni engalo ez’amaanyi n’okujeebaza olw’obukumi bw’emuwa. Bujjingo yanyonyola nti gavumenti ya Museveni eva mu buyinza ne butwalibwa abali ku ludda oluvuganya mu kalulu ka 2026, bagenda kumuzoganya olwo abalabe be bamusanyeewo.
Bakomando mu ggye lya Special Forces Command (SFC) nga ly’erikuuma Museveni, abafamile ye, abantu ab’enkizo mu gavumenti n’ebitongole beddiza securite ya Bujjingo ku ntandikwa y’omwaka guno oluvanyuma lw’okusimattuka abatujju abaamukolako obulumbaganyi ne batta Richard Muhumuza eyali dereva we, era omukadde w’ekkanisa.
Gen Muhoozi Kainerugaba omuduumizi wa UPDF era mukwano gwa Bujjingo yakakasa nti Bujjingo baamulumba olwokubeera omuwagizi w’ekisinde ky’ebyobufuzi ki Patriotic League of Uganda(PLU) ky’akulira n’alangirira nga bwagenda okukola kyonna ekisoboka okukakasa nti abo bonna abenyigira mu bulubanganyi buno bakwatibwa ne babonerezebwa.
Munnamateeka Hassan Male Mabirizi ataggwa kuwaaba yalumiriza nti ab’oludda oluvuganya gavumenti Museveni balina omukono mu bulumbaganyi obwakolebwa ku Bujjingo wabula kino abasecurite tebaakikakasa nga n’okutuusa kati omwogezi wa poliisi Rusoke Kituuma yategeeza nti okunonyereza ku butemu buno kukyagenda mu maaso nga tewali muntu yenna yaakwatiddwa.
BUJJINGO ABEERA ALUMBA BOBI? Bujjingo atera okukozesa ebigambo eby’obusagwa ng’abuulira enjiri ebinyiiza ab’oludda oluvuganya naddala abawagizi ba pulezidenti wa NUP Robert Kyagulanyi Ssentamu (Bobi Wine).
Mu kiseera ky’okuyisa etteeka ku bisiyaga, Bujjingo yasaba Bobi Wine aveeyo mu lwatu awagire etteeka eryo ng’alumiriza nti akolagana n’abagagga Abazungu abasaasaanya ebisiyaga mu nsi yonna.
Bugingo yagugulana nyo n’omugenzi Anthony Wameli omu ku baali balooya ba NUP bweyamutwala mu kkooti ng’amugguddeko omusango gw’okwokya Bayibuli. Ebigambo byeyayogera [Bujjingo] nga Wameli afudde byanyiiza aba NUP ne bamulabula nti gavumenti ya Museveni bweneegwa bagenda kumulangirira nga Munnaddiini omumenyi w’amateeka.
Bujjingo era agugulana ne munnamateeka Erias Nalukooya omu ku balooya ba NUP, obutakkanya bwabwe bwava ku musango Nalukoola gwe yeesimbamu ng’ayagala kkooti eyise ekiragiro ekigaana Bujjingo okusaba ekiro nti aleekaanira abantu b’e Bwaise, Makerere nga beebase.
MIRUNDI AYIIRAWO BUJJINGO OMUBIRI: Omugenzi Joseph Tamale Mirundi eyali omuwabuzi wa Museveni ku nsonga z’amawulire nga tanafa, yalumiriza nti Bujjingo bamuwalana lwakuwagira Museveni mu lwatu ng’okumunafuya obulungi baalina okuyingirira amaka ge nga bakozesa mukyalawe Teddy Naluswa Bugingo okumuggulako emisangogy’obwenzi mu kkooti ng’ekigendererwa kyakumusibya mu kkomera.
Balooya ba Bugingo nga bakulemberwamu Ronald Ruhinda baalwana nyo okutaasa Bujjingo obutawozesebwa bwe baddukira mu kkooti etaputa ssemateeka okutaputa oba omuntu waabwe okuwasa omukazi Suzan Makula gwali musango ogulina okumusibya mu kkomera nga singa gavumenti ya Museveni ava mu buyinza mu kiseera kino abatutte obuyinza basobola okuttusa omusango ogwo ne basiba Bugingo ng’okusimattuka abeera alina okuddukira mu buwang’aguse.
2. SHEIKH RAMATHAN SHABAN MUBAJJE
Ibrahim Ssemujju Nganda omubaka wa Kira Municipality alumiriza nti embeera yatabukira Sheikh Shaban Ramathan Mubajje mufuti wa Uganda, Museveni bweyamutabukira ku bufere bwakola ng’atunda emmaali y’Obusiraamu nga tasoose kubeebuuzaako.
Ssemujju alumiriza nti Museveni okutabuka, kyaddirira Mubajje okwegatta ne bakulembeze banne mu mukago ogugatta abakulembeze b’eddiini mu ggwanga lyonna ogwa Inter Religious Council mu 2011 ne basaba Museveni ateese n’aboluda oluvuganya abaali bakulemberwamu Dr Kizza Besigye abaali balemeddeko nti Museveni yabba obuwanguzi bwabwe mu kalulu ka 2011 era yali atudde mu ntebe nzibe.
M7 AKANULIRA MUBAJJE AMAASO
Ssemujju alumiriza nti Museveni eyali omukambwe, yabuuza Mubajje lwaki ye tateesa n’Abasiraamu abamutwala mu kkooti ku by’obufere ng’atunda obugagga bw’Ousiraamu.
Ssemujju ategeezezza nti okuva olwo, Mubajje tasobola kuddayo kwogera kigambo kyonna kibi ku Museveni kubanga akimanyi nti y’amukwatiridde obutatwalibwa mu kkomera ku misango gy’obufere.
Mu 2007 kkooti ya Buganda Road yasingisa Mubajje emisango gy’obulimba wadde nga teyaweebwa kibonerezo kyakusibwa mu kkomera ate mu 2023 yaddamu okusimattuka ekkomera bawanyondo bwe baali bamalirizza okufuna ekiragiro kya kkooti okutunda Omuzikiti omukulu ogw’Obusiraamu e Kampalamukadde ku nyondo olw’ebbanja Mubajje lyeyaguliirako ne limulema okusasula.
Ebbaluwa Museveni gyeyawandiikira ssaabalamuzi Dollo ye yataasa Mubajje okukkakkanya embeera wabula ebiwayi by’Obusiraamu ebiwakanya obukulembeze bwe biwera nti gavumenti ya Museveni weegendeera Mubajje alina okusasulira byonna by’akoze.
3: ‘NABBI’ SAMUEL KAKANDE EBIBYE BIBI
Omulamuzi wa kkooti ensukkulumu Catherine Bamugemereire ne banne ku kakiiko akaalondebwa Museveni okunonyereza ku mivuyo n’obufere ku ttaka, baakola lipooti eyasemba omusumba omukulu ow’ekkanisa ya Synagogue Church of All Nations e Mulago ku bbiri ng’ono atera okweyita Nabbi aggulweko emisango egyekuusa ku bufere ku ttaka.
Kakande akakiiko kaakizuula nga yenyigira mu kufera mailo z’ettaka ezisoba mu 5 e Bukakata mu disitulikiti y’e Masaka n’asengula abantu abanaku abaalinako ebibanja ng’akozesa abanene mu bitongole bya securite.
Gavumenti empya esobola bulungi okuteekesa mu nkola ebyasalwawo akakiiko ka Bamugemereire nga kuno baagattako n’obufere obuzze bumwogerwako omuli n’okukola ebyamagero by’obulimba ng’atunda omuceere n’ebibala ebirala by’ayita eby’omukisa.Kuno agattako n’okusuula abantu ebigwo.
More Read
4: PAASITA SSENYONGA
Poliisi y’e Wandegeya n’okutuusa kati ekyanonyereza ku musumba Jackson Ssenyonga ow’ekkanisa ya Christian Life Church esangibwa e Makerere Kavule olw’omukazi Rossete Najjuma okufiirayo.
SSENYONGA BEYANYAGAKO ETTAKA BAKYAWERA
Abafamile ya Ssenyonga era bamulumiriza okukozesa abanene mu gavumenti okubanyagako ettaka lya bazadde baabwe nga n’abakozi be enfunda nyingi bamugguddeko emisango mu kkooti z’abakozi olw’obutabasasula misaala wabula bonna bakakasa nti kizibu okumuwangula olwa gavumenti ya Museveni okumuwagira.
Ono gavumenti ya Museveni bwegwa gavumenti etalina mikwano esobola okumuggulako emisango n’emusiba n’avundira mu kkomera. Ono era balina akakuku ne Bujjingo nga buli kiseera babeera beesojja nga Bujjingo lumu yatuuka n’okutegeeza nti; Akasajja ako kalina omutima omubi.
5: SHEIKH MUHAMMAD LUNAANOBA YABBA ABASIRAAMU OBUWUMBI 5?
Ono ekitongole kya poliisi ekinonyereza ku misango ki CID kimunonyerezaako ku misango gy’obufere gye yazza ng’akyakulembera ekiwayi ky’Obusiraamu ekya Juma Zukuli.
Abasiraamu be baggula emisango ku Sheikh Lunanoba nga balumiriza nti bweyaberera mu ofiisi yabulankanya ssente ezisukka mu buwumbi 5 nga baagala asibwe mu kkomera oba bamuwalirize okuzisesema.
Ensonda zitubuulidde nti ono ne banne okuli Sheikh Sebuta Malende eyali ssaabawandiisi, Hajji Mawazi Lulagala, Lukeman Malende, Hussein Kaggwa, Erias Seviri ne Abbas Mugambe bayigga Museveni abataase.
6: PAASITA FRANKLIN MONDO MUGISHA
Ono y’akulira ekkanisa ya Empowerment Christian Centre Church International, mu kiseera kino aliira ku nsiko oluvanyuma lw’omulamuzi Gladys Kamasanyu okumuyisaako ekibaluwa w’omusanga mukwate.
Mondo gavumenti emulumiriza okufera obuwumbi 4.5b nga yeekwese mu linnya lya pulezidenti Museveni.
Yasooka kuddukira South Africa ne yeeyongerayo e Canada wabula ensonda mu securite zitegeezezza nti ali Kenya gyayagala okutandika ekkanisa.
Wadde gavumenti erina obusobozi obuyigga Mondo ne bamukomyawo mu Uganda n’awoza emisango gy’obufere, yamuleka. Abaaferebwa balumiriza nti alina abanene mu gavumenti abamulwanirira obutavunaanibwa, wabula ono alina okweyinula ng’alekamu.
7: PAASITA KAYANJA
Paasita Solomon Male alumiriza nti enfunda nyingi abanene mu gavumenti be bataasa paasita Robert Kayanja owa Miracle Centre Church e Lubaga mu Kampala.
Mu 2006 ebitongole bya securite byanonyereza ku Kayanja ku biteeberezebwa okubeera nga yali akukusa eby’amaguzi okubiyingiza mu ggwanga.
Mu kiseera kino Kayanja ali mu kkooti n’abavubuka balumiriza nti waliwo basumba banne ababakozesa okumwonoonera erinya nga bakimuteekako nga bweyabalya ebisiyaga.
Kayanja ebiseera bingi akulemberamu okusaba ku mikolo okubeera pulezidenti Museveni era y’omu ku basumba abamanyiddwa nti bawagira gavumenti ya Museveni.
8: OBUGAGGA BWA PAASITA TOM OW’E MUTUNDWE BUSATTIZA ABA M7
Ono bambega mu bitongole by’eggwanga ebikessi bikyamunonyerezaako ku buwumbi n’obuwumbi bwa ssente bwalina ku akawunta ze mu bbanka nga beebuuza Paasita Tom gy’aggya ssente ezo zonna.
SSENTE PAASITA TOM Z’AYINGIZA OLUNAKU ZITIISA!
Ensonda mu securite zirumiriza nti buli lunaku ssente ezisoba mu bukadde 100 bwe bugwa ku akawunti za Paasita Tom Mugerwa omusumba omukulu ow’ekkanisa ya Mutundwe Christian Fellowship-MCF nga totaddeeko zigenda ku masimu ge.
Ensonda zitegeezezza nti Mugerwa yabuulira bambega nti ssente ezigenda ku akawunta ze bagoberezi be be baziteekako nga basuubira eby’amagero.
Kigenda kubeera kizibu okuggula omusango gwonna ku Mugerwa kubanga y’omu ku bawagizi ba gavumenti ya Museveni wabula gavumenti empya ng’eya Museveni egenze eyinza okumuggulako emisango nga bayinza n’okubowa ennyumba ye etemya ng’omuntu n’eyo gye yazimbira mutabani we Tom Balaba ku luguudo lw’e Entebbe.
9. BISHOP JACITO KUBUUKA
Bishop Jancito Kibuuka akulira ekkanisa ya Evangelical Orthodox Church okutabuka n’abakulu mu Ekereziya Katolika e Lubaga, kyaddirira omuwala Winnie Nantongo okulumiriza Kibuuka okwegatta nga naye ate nga Ffaaza.
Kibuuka yaggula emisango ku Nantongo ng’amulumiriza okumulebula wabula kkooti omusango mu 2016 yagugoba olwa Kibuuka okubulwa obujulizi.
Ab’omunda balumiriza nti singa Kibuuka teyalina basajjabe mu gavumenti abaamulwanirira, omuwala yali amuwangula, era ensonda zirimiriza seculite y’eyimirizzaawo ekkanisa ye.
10: PAASITA IMELD NAMUTEBI
Mu 2003, Paasita Emelda Namutebi ow’ekkanisa ya Liberty Worship Church Centre e Lugala, yatunula butunuzi ng’abagoberezi be bakuba bannamawulire.
Abagoberezi bannamawulire baali babalanga kuwandiika ku musumba waabwe nga bwali omubbi w’abasajja nga Tom Kula omusajja gweyali yaakafuna yali mufumbo ng’alina omukyala n’abaana.
Omu ku bamawulire abaakubwa atubuulidde nti teyaggula ku Namutebi musango gwonna kubanga yali akimanyi nti ne bw’anaamuwawaabira tebagenda kumuvunaana olw’enkolagana ennungi gyalina ne gavumenti ya Museveni.
