GODFREY KATONGOLE ono nga y’akulira ekimu ku bibiina by’abasuubuzi ekya Uganda National Traders Alliance (UNATA), ayisizza ebiragiro ebikambwe eri abasuubuzi abakyakukuta n’ebiina by’abasuubuzi ebirala nti boolekedde akaseera akazibu.
Ensonda mu kibiina kya UNATA zitubuulidde nti Katongole okuyisa ebiragiro bino, kiddiridde enteekateeka egenda mu maaso okumulayiza nga pulezidenti w’abasuubuzi mu ggwanga lyonna, oluvannyuma lw’okulondebwa abasuubuzi mu ttabamiruka w’abasuubuzi eyatuula ku Grand Imperial Hotel mu Kampala omwaka oguwedde.
Katongole yasinzidde mu lukiikko lw’abasuubuzi abeegattira mu kibiina ky’akulembera olwabadde mu kibangirizi kya Mambo Hotel ku kizimbe kya Paaka Nkadde Mall nga lwetabiddwamu abakulira ebyokwerinda, abakungu b’omumaka gw’Obwa pulezidenti , aba URA n’abakulembeze b’ekibiina kya UNATA ne boogera ku nsonga eziruma obusuubuzi.
BEEWEREDDE BAKIFEESI:
Abasuubuzi basabye polisi ekwate bakifeesi abEerimbika mu busuubuzi nga beefudde abeetissi b’emigugu ne babanyaga emmaali yaabwe ng’abamu beerimbika mu bibiina ebigamba nti bikulembera basuubuzi.
More Read
Bongeddeko nti bakooye abavubuka abakola eggaali mu kibuga nga beerimbisi mu busuubuzi kyokka ne babeefuulira ne babbako emmaali yaabwe, kino kyanyiizizza ssentebe wa UNATA Katongole n’alaga obulumi bwe bayitamu okubeera n’ebibiina bya basuubuzi ebijjudde abafere n’ayisa ebiragiro eri abasuubuzi abakyakukuta n’ebiina ebitali mu mateeka nti bw’anaalayizibwa nga tebanamwagattako bagenda kufuna obuzibu okuyambibwa ku nsonga z’ebyobusuubuzi.
EBIBIINA EBIGUGULANA NE KATONGOLE
Ebibiina ebitakkiriziganya na bukulembeze bwa Katongole kuliko ekya United Arcaders’ Traders Entrepreneurs Associations (UATEA) ekya Edward Ntale, Kampala Arcardes Forum (KAFO) ekikulirwa Charles Ddamulira, KACITA ekya Thadeus Musoke ne’birala Katongole byalumirizza nti biriwo kugoba ddiiru so si kulwanirira basuubuzi.
Ensonda zongedde okutegeeza nti Katongole okulabula abasuubuzi kigambiwa ayagala kusanyalza pulaani ya John Kabanda owa FUTA ng’ono naye abasuubuzi abamukkiririzaamu bapanga bamulayize mu bwangu nga pulezidenti waabwe ow’abasuubuzi mu ggwanga lyonna, okulonda kusuubirwa kubeera mu kisaawe kya Hamz Stadium e Nakivubo ng’abasuubuzi abasoba mu 5000 okuva mu bitundu by’eggwanga eby’enjawulo be basuubirwa okubaawo.
LWAKI KABANDA NE KATONGOLE BEERWANA?
Katongole ye yali nanyini kibiina kya basuubuzi ekya KATA, wabula ne yeegatta ku kibiina kya Kabanda ekya Kampala New Generation Traders’ Association eno gye baava ne bakola ekibiina eky’awamu ekya Federation of Uganda Traders Associations (FUTA), Kabanda n’alondebwa nga pulezidenti ow’ekiseera nga Katongole y’amumyuka kyokka ne baawukana ku bigambibwa nti waliwo ensimbi ezaava ewa pulezidenti Museveni ezaayingira mu kibiina kino engabana n’ebatabula. Katogole kwekutandikawo ekibiina kya UNATA n’alondebwa nga pulezidenti, aba FUTA ne KACITA kyebawakanya nti obukulembeze bwe gavumenti tebumanyi.
KABANDA AYOGEDDE
Kabanda ategeezezza nti tewali kigenda kubalemesa kugenda mu maaso kubanga FUTA ky’ekibiina kyokka pulezidenti Museveni kyamanyi y’ensonga lwaki yabawa entambula eyambako okukola emirimu gy’abasuubuzi.
EBIRI MU PULAANI YA KABINJA AKEESWANTA OKULEMESA KABANDA OBWAPULEZIDENTI
Ensonda mu basuubuzi zitubuulidde nti waliwo ekibinja ky’abasuubuzi abeeyita abanyiivu bakanywamusaayi abeesomye okulumba emikolo omuli ogwa Katongole ne Kabanda gyebategese okulayizibwa bafaafaagane nabo bayiwe emikolo. Kigambibwa nti ekibinja ky’abasuubuzi bano baakoowa obukulembeze bwa basuubuzi kubanga ababeera mu bifo beerimbika mu busuuzi ne bafera gavumenti nti be bakulembera abasuubuzi mu ggwanga gavumenti n’ebawa ssente ziyambe ku basuubuzi kyokka ne bazirya. Gyebuvuddeko abamu ku bakulembeze mu kibiina kya FUTA baaweebwa emmotoka kapyata ezaakyankalanya obusuubuzi.
KABANDA OKWEGATTA KU MUSOKE OWA KACITA KIMUZAALIDDE EBIZIBU
Kigambibwa nti ekya Kabanda okulangirira nga bwagenda okuwagira ssentebe w’ekibiina kya KACITA Thadeus Musoke Nagenda ku kifo kya loodi meeya wa Kampala ku tikikiti ya NRM, nakyo kimuzaalidde ebizibu, abasuubuzi bagamba takyalina mulimu gwakola okutwala obusuubuzi mu maaso, obudde abumala mu byabufuzi olw’okuba ayagala kufuna ku ddiiru za ssente ensava ekibiina kya NRM gye kigenda okuwa Musoke zimuyambeko okunoonya akalulu singa anaawangula akamyufu ka NRM n’akwattira ekibiina bendera.
