SSAABAWOLEREZA wa gavumenti Kiryowa Kiwanuka ne balooya abalwana okulaba ng’omulamuzi wa kkooti ensukkulumu Dr. Esther Mayambala Kisakye ng’agobwa mu bulamuzi amagezi gabeesibye bw’aleese obulippo obukambwe okulemesa okuteekesa mu nkola ebiragiro bya pulezidenti Museveni okumugoba nga taweereddwa kasiimo kalina kumuweebwa mu mateeka.
Ku ntandikwa ya 2025, pulezidenti Museveni yalonda akakiiko akakulirwa omulamuzi wa kkooti ensukkulumu eyawummula Galdino Okello, abalala kuliko omulamuzi Jotham Tumwesigye, omulamuzi Justice Winfrid Beatrice Karosso, munnamateeka Odumbi James Owere okuwozesa Kisakye n’okumukolera lipooti ekakasa oba agobwa mu bulamuzi nga talina ky’afune.
BAASEMBA KISAKYE AGOBYE
Museveni okulonda akakiiko kano, kyaddirira omulamuzi Benjamin Kabiito eyali akulira akakiiko ka Judicial Service Commission -JSC okukola lipooti nga kasemba omulamuzi Kisakye okugobwa mu bulamuzi olw’okutyoboola ssaabalamuzi Owiny Dollo eyamuloopa.
Dollo okuddukira mu JSC, kyaddirira omulamuzi Kisakye okugaana okumuwa ensala ye gyeyali awandiise mu musango pulezidenti wa NUP Robert Kyagulanyi Ssentamu (Bobi Wine) gweyali atutte mu kkooti ensukkulumu ng’awakanya obuwanguzi bwa Museveni mu kalulu ka 2021.
More Read
Kisakye alumiriza Dollo okulagira bakkomando abamukuuma okukozesa eryanyi okusika fayiro mweyali awandiise ensala ye ku lyanyi ne bagibba ne bakuuliita nayo nga n’okutuusa kati tebagimuddiza nga nti kino Dollo yakikola ng’agezaako okumutiisatiisa obutasoma nsala ye eyali eyawukana ku ya banne abalala abaali bawagira pulezidenti Museveni ate nga ye awagira Bobi Wine.
EBIMU KU BYALI MU NSALA YA KISAKYE
Omulamuzi Kisakye eyeddira ekkobe yanyonyola mu nsala ye nti Dollo yali tasaanye kutuula mu musango gwa Bobi Wine ate nga yaliko looya wa Museveni ng’omuntu nga amuwolereza mu misango omuli n’egyebyokulonda ate nga n’omusango gwennyini gwe baali bawuliriza bwegwatwalibwa mu kkooti, Dollo yalabwako mu kafubo ne Museveni mu State House Entebbe ekintu ekireetawo okubuusabuusa oba nga ddala asobola okuwa obwenkanya.
Dollo yakkiriza nti ddala yaliko looya wa Museveni wabula n’anyonyola nti engeri gyeyakuba ekirayiro okugaba obwenkanya ng’omulamuzi, okutuula mu musango gwa Museveni yali asobola bulungi okugumusingisa n’alumiriza n’omulamuzi Kisakye okumulebula ng’ayambwako munnamateeka Male Mabiriizi ow’ekkobe.
Wadde omulamuzi Kisakye yawang’angukira mu America ng’alumiriza nti obulamu bwe bwali mu matigga nga waliwo abaagala okumuttira e Uganda, yalagidde bannamateeka be abakulemberwamu Peter Walubiri okukola ku lukwe lwa Dollo ne Museveni okumugoba mu bulamuzi nga bayita mu mateeka.
Ono yatutte omusango mu kkooti etaputa ssemateeka ng’awakanya Museveni okumugaana okuwummula nga bweyali amusabye nga yeekwasa okunonyereza akakiiko ka JSC kwe kaali kamukolako olw’okusiiwuuka empisa ekintu kyalumiriza nti kityoboola ssemateeka wa Uganda.
Ono era yatutteyo omusango omulala ng’awakanya Museveni okulonda akakiiko okumunonyerezaako ng’alumiriza nti kino kyeyakoze kityoboola ssemateeka ng’ayagala abalamuzi ba kkooti eno 5 basooke bamuwe ekiragiro ekiyimiriza akakiiko kano okutandika emirimu gyako okutuusa ng’emisango gye gyonna gye yawaabira gavumenti ya Uganda nga giwuliddwa n’okusalwa.
Kisakye yasooka kuwawaabira Dollo, omuwandiisi w’enkalakkalira mu kitongole ekiramuzi Pius Bigirimana ng’abantu ne ssaabawolereza wa gavumenti olw’okukwata omusaala gwe n’okumumma obusiimo bwalina okufuna ng’omulamuzi wa kkooti ensukkulumu nga kuno kwe baagatta n’okumuma emisango gy’okuwulira nga woofiisi agijjamu kusoma mpapula, okunywa caayi n’okwebuzaabuza.
Kisakye yawagidde okusaba Mabirizi kweyatutte mu kkooti ng’ayagala bamukkirize yeegatte ku misango gya Kisakye ng’alumiriza nti alina obujulizi bungi obugenda okuyambako kkooti okusala amazima kubanga yaliwo n’alaba n’amaaso ge nga Dollo atyoboola eddembe lya Kisakye n’okumenya ssemateeka.
SSAABAWOLEREZA YEEWERA
Wabula Dollo ne ssaabawolereza wa gavumenti baawakanyizza okusaba kwa Mabirizi nga balumiriza nti bw’abeera alina obujulizi obubaluma alinde Kisakye amuleete ng’omujulizi we nga talina kwegatta ku musango mu butongole.
Fayiro zonna ezikwata ku misango gino zaawedde okuteekateeka ng’essaawa yonna omuwandiisi wa kkooti etaputa ssemateeka agenda kuziweereza mu maaso g’abalamuzi 5 batandike okuziwulira mu butongole.
