BALOOYA ssabawaabi w’emisango gya gavumenti omulamuzi Jane Frances Abodo beyasindise mu kkooti okumatiza omulamuzi wa kkooti y’e Nakawa Esther Nyadoi okubawa olukusa okukebera essimu ya Dr. Kizza Besigye n’omuyambi we Hajji Obed Lutale Kamulegeya batuuyana bwezikala olw’omusango okubazitowako.
Lino Anguzo gwe baakwasa omulimu gw’okukulemberamu balooya ba gavumenti okuwozesa Besigye ne banne, ku ntandika y’omwezi guno yategeeza omulamuzi Nyadoi nga bwe bagenda okuteeka okusaba mu maaso ge nga basaba abawe ekiragiro ekibakkiriza okukebera amasimu g’abasibe okusobola okufunamu obujulizi obugenda okubayambako okubasingiza emisango gy’okugezaako okulya mu nsi olukwe n’okutabangula emirembe mu ggwanga.
Wiiki ewedde Anguzo yasindise ttiimu ya balooya ba gavumenti abaakulembeddwamu Richard Birivumbuka ne Joseph Kyomuhendo okusaba omulamuzi abakkirize okusaba kwabwe bakuwulire mu kkooti nga temuliimu bannamawulire n’abantu ba bulijjo okuggyako abawawaabirwa ne balooya baabwe nga kino balumiriza nti bakikoze okusobola okutaasa abajulizi baabwe abagenda okuwa obujulizi okuwagira okusaba kwabwe.
Ensonda mu ofiisi ya ssabawaabi zitubuulidde nti bambega mu bitongole bya bambega abakola ku fayiro ya Besigye ne banne balina obukakafu nti Brig Gen Robert Freeman Mugabe eyasooka okubavunaana mu kkooti y’amagye yali agenda kubakkiriza okuwa obujulizi mu kkooti nga temuli bannamawulire okusobola okubakuuma nga bakyama kubanga ebikwekweto bye basindikibwako ebiseera ebisinga bibeera byakyama nyo nga bannansi tebagwanye kubategeera.
More Read
Bambega bano batadde balooya ba gavumenti ku bunkenke nga bategeeza nti okujja okuwa obujulizi mu kkooti bannamawulire tebalina kubeeramu ekintu balooya ba Besigye kyebawakanya nga balumiriza nti buli kimu kirina kukolebwa mu lwatu ensi etegeere si bya kwekweka.
Omulamuzi balooya yabalagidde okuddayo mu kkooti nga 4 April 2025 asalewo oba akkiriza abajulizi okuwa obujulizi mu nkukutu oba akigaana.
BALOOYA BA GAV’T BALI MU KATTU
Ensonda zongeddeko nti balooya ba gavumenti bali mu kattu k’amaanyi nyo kubanga obujulizi obusinga obwateekebwa ku fayiro tebuzitowa kusingisa Besigye ne banne misango nga kino kiteekebwa ku ngeri gye bwakung’anyizibwamu okuviira ddala e Kenya gye baawambibwa. Obujulizi okumatiza kkooti bulina okubeerako abajulizi ababuwagira nga beetegefu balooya ba Besigye okubookya ebibuuzo.
BALOOYA BA GAVUMENTI NABO BATIDDE
Ngoggyeko abajulizi, balooya ba gavumenti balabise nga fayiro ya Besigye ebazitoyeeko, omu yawuliddwa ng’abuulira munne nga bweyali yakoowa emisango gya Besigye olw’obunkenke obugibeerako era okukakasa kyagamba yamulaze obubaka bwe baabadde bamuweerezza ku ssimu ng’abantu bamuvuma nga bwali omutemu nga ne famire ye bagiyingiza mu by’okuwozesa Besigye.
BESIGYE ALEMEDDE KU LOOYA OMUKAZI MUNNAKENYA
Wiiki ewedde Besigye yawandiikidde omulamuzi Irene Mulyagonja akulira akakiiko ka Uganda Law Council ng’abategeeza nga bwalonze munnamateeka atabwekebera Marth Karua Munnakenya okukulemberamu ttiimu ya bannamateeka abagenda okumuwolereza ku misango egyamuggulwako.
Uganda Law Council -ULC, Karua yali yamukkiriza kuwolereza Besigye mu kkooti y’amagye yokka gye yasooka okuwozesebwa okutuusa kkooti ensukkulumu bweyasalawo nti okuwozesa abantu ba bulijjo mu kkooti y’amagye kimenya ssemateeka.
Ensonda mu bannamateeka ba Besigye zitegeezezza nti essaawa yonna Karua waakuddamu okusaba olukusa okuwolereza Besigye ne banne mu kkooti za bulijjo nga kino akikola kubanga amateeka ga Uganda tegamukkiriza kuwoleza mu kkooti za Uganda okuggyako ng’afunye olukusa okuva mu ULC akakiiko akakwasisa balooya empisa mu Uganda.
Bino okubaawo ng’Omuloodi Ssaalongo Erias Lukwago yaakakulemberamu balooya ba Besigye ne Lutale okusaba omulamuzi Comfort Khania owa kkooti enkulu okukkiriza abantu baabwe okweyimirirwa okuwoza nga bava wabweru w’ekkomera.
Kkooti yateekawo olwa 11 April 2025 okuwa ensala yaayo oluvanyuma lw’omuwaabi wa gavumenti okutegeeza nga bwe yeetaaga obudde okwetegereza ebiwandiiko ebyateekebwayo Besigye ne Lutale kw’ossa n’ebikwata ku bajulizi be baaleeta okubeeyimirira.
