ROBERT MAYANJA omu ku bayambi ba Dr. Kizza Besigye ab’okulusegere akakasizza ONO BWINO nga mukamawe bwabawadde ebiragiro ebikambwe okumutaasa ku bafamire ye n’abanene okuva mu bitundu by’e Rukungiri gy’azaalwa abatandise okupanga okumutwala mu State House okusisinkana pulezidenti Museveni ne mutabaniwe Gen Muhoozi Kainerugaba abeetondere olw’okwagala okubaggya mu ntebe gye baakamalamu emyaka egikunukkiriza mu 40.
Mayanja okwogera bino, nga Dr. Winnie Byanyima akakasizza nga bwanoonya Museveni boogere ku nsonga z’okusiba omwami we Dr Besigye n’okukkaanya ku ngeri gyasobola okuyimbulwamu okuva mu kkomera n’abasibe abalala abaasibwa ku misango gy’ebyobufuzi naddala abavubuka abawagira pulezidenti wa NUP Robert Kyagulanyi Ssentamu (Bobi Wine).
Byanyima ategeezezza nti Museveni azze amusindikira abanene ng’ayagala okumusisinkana okubaako ensonga ze bakkanyako, wabula ku mulundi guno alabika ng’amwewala okumusisinkana wadde ng’akakasa nti okwogera naye kwekugenda okuyamba Besigye okuva mu kkomera nga ne bwe banaakola batya balooya abakulemberwamu Munnakenya Marth Karua tebagenda kumuggya mu kkomera.
Byanyima yalumirizza nti omwamiwe Museveni amutulugunyizza ebitagambika nga ne mu kkomera gyamusibidde yalagira abasirikale b’amakomera e Luzira okumulumya ebiku n’okumusibira mu kasenge mwebasibira abatujju ab’omutawaana nga Sheikh Jamil Mukulu Kyagulanyi aduumira abatujju ba ADF abaagala okutta Museveni.
More Read
M7 YEETAAGA KUTEESA NAYE EGGWANGA LIMUWONE
Byanyima ayongeddeko nti okuteesa ne Museveni kye kyokka ekigenda okutaasa Uganda obutagenda mu katabanguko amawanga nga Sudan, Somalia, Libya mwegali kati. Byanyima olwamaze okusaba kuno, n’alinnyirawo enyonyi naddayo e Bulaaya okusisinkana mutabani waabwe Anslem Besigye asomera mu America ng’ono yategeezezza nti yabadde amulindiridde ng’aliko n’ekirabo ky’akakomo ne nnekireesi byeyabadde amugulidde.
OMUYAMBI WA BESIGYE ALEESE BWINO KU BIRAGIRO EBIPYA DOKITA BYEYABAWADDE
Mayanja atubuulidde nti Byanyima olwamaze okwogera byeyayogedde, ye n’akulemberamu ttiimu okugenda e Luzira okwebuuza kumukama waabwe bakakase oba ye yatumye mukyalawe okumatiza bannayuganda nga bwe beetaaga okuteesa ne Museveni amusonyiwe.
BESIGYE AKOMBYE KU PPAASI
Ono atunyonyodde nti baasoose kubagaana kusisinkana Besigye. Naye oluvanyuma baabakkiriza ng’eno Besigye gye yabakakasirizza nga bwatatumangako Byanyima kumuteeseza wa Museveni era ye si mwetegefu kuva mu kkomera olwokuteesa ne Museveni nti amateeka bwegabeera galemeddwa okumuyimbula ye mwetegefu okufiira mu kkomera.
Ono atubuulidde nti Besigye yababuulidde nti ye mujaasi ng’embeera gyayitamu mu kkomera teyenkanankana na gyeyayitamu emyaka 5 mu nsiko ng’alwanyisa gavumenti embi wadde nga yali amanyidde obulamu obulungi mu ddwaliro e Nairobi mu Kenya gyeyali asasulwa obulungi n’okunyumirwa ensi.
Besigye yabuulidde banne nti awaddeyo bingi okuli n’okufiirwa ab’oluganda lwe, muganda we, mikwano gye ng’ayagala Uganda eyeeyagaza nga tasobola kubeera ng’atuuse waalengerera okwenunula ate n’azzaayo situlago olwokweyagaliza ye ng’omuntu nga kuno kubeera kulya ggi kwesubya muwula. KB yagambye nti kino waakigerezaako abantu bangi bagenda kukwatibwa basibwe mu kkomera olw’ebyobufuzi ng’okuyimbulwa balina kufukamirira Museveni n’abaana be ky’alayidde n’akomba ne ku ppaasi nti ye nga Besigye tasobola kukikola ng’akyali mulamu.
Mayanja atubuulidde nti Besigye abagambye tebaddayo okuwuliriza omuntu yenna kaabeere wa famire ye okuggyako bannamateeka be ababiri Karua n’Omuloodi Ssalongo Erias Lukwago ng’obuvumu bwe baamulaga ng’agaanye okusaba okweyimirirwa mu kkooti y’amagye wadde nga Byanyima yali amuperereza ne balooya abalala akkirize bwe bugenda n’okumuwanguza embeera ey’okusomooza kati gyayitamu.
BASIIBULA BESIGYE MU KKOMERA
Mayanja ategeezezza nti baavudde e Luzira nga bagumye nti musajja waabwe si mwetegefu kumutwalira ku mpingu mu State House bamutuuze wansi nga Museveni ne Muhoozi batudde mu ntebe afukamire abeetondere nga yabategeezezza nti kino okubaawo waakiri afa.
Ono atubuulidde nti nga famire bakimanyi bulungi lwaki Byanyima apondoose n’ayagala n’okuteesa ne Museveni kubanga amanyi obulamu bw’omwamiwe naye alina okukimanya nti oli yafuuka kyabugagga kya ggwanga ng’okusalawo kwonna okumukolebwako bannayuganda bonna bannanyini be balina okwebuzibwako.
Besigye ebiragiro agenze okubiwa ng’ensonda zikakasa nti omulabirizi wa North Kigezi, Onesimus Asiimwe akulembeddemu ebikonge okuva e Rukungiri Besigye gy’azaalwa okuteekawo enteeseganya ne Museveni ayimbule omwana waabwe.
Lt Gen Henry Tumukunde eyaliko minisita wa securite yalabula nti Museveni bwatayimbula mwana waabwe tasuubira buwanguzi bwonna mu kalulu ka 2026 mu kitundu kyabwe kubanga bo bakakasa nti Besigye bamusiba lwa byabufuzi.
Muhoozi yalayira nti Besigye bwateetondera ne kitaawe (Museveni), bagenda kumuwa ekibonerezo kyakumusiba ku muti omunene mu bitundu bya Acholi bamukube amasasi mu lujjudde afe — kino kyatiisa nyo Byanyima n’ategeeza banne nti ku bintu omwamiwe byakoledde Uganda tasaanye kufa bwatyo.
Omuwabi wa gavumenti Richard Birivumbuka ne banne balumiriza nti Dr Besigye yalina pulaani y’okutta pulezidenti Museveni n’omulambo agusanyewo nga kuno yali agasseeko n’okuwa abanene mu gavumenti obutwa baffe ng’eno y’ensonga lwaki abasecurite baamuwambira e Kenya nti gyeyali agenze okumaliriza pulaani yonna mu 2024, okuva olwo ali mu kkomera e Luzira era agenda kuwezaayo mwaka nga bamusiba n’omuyambiwe Hajji Obed Lutale Kamulegeya n’omujaasi Capt Denis Oola.
