ABASERIKALE abakuuma akulira oludda oluvuganya mu palamenti Joel Ssenyonyi era MP wa Nakawa West, baatuuyanye okutaasa abanene mu NUP ku ba Foot Soldiers abaabadde baagala okubatta.
Olutalo luno lwabadde ku kisaawe ky’omupiira e Kireka mu kifo ekimanyiddwa nga mu Kirema mu Kira Municipality, ku mukolo munnamateeka wa NUP George Musisi gweyategese okukwasa ttiimu empanguzi ezeetabye mu mpaka zino mu mupiira gwa basajja n’abakazi.
Ku mukolo guno, Musisi yayise ebikonge bingi okuva mu kibiina kya NUP okumubeererawo mu kaweefube gwaliko okumatizza ab’e Kira bamulonde asiguukulule MP aliko Ibrahim Ssemujju Nganda.
BITANDIKA BITYA
Obunkenke bwatandise nga Ssenyonyi, Benjamin Katana omwanika wa NUP, Omubaka wa Kawempe North omugole Erias Luyimbaazi Nalukoola, Peter Maiso—omu ku bakulira okulonda mu NUP ate nga ye kansala wa Kasokoso eyeegwanyiza ekifo ky’obwa mmeeya bwa Kira Municipality ne Norman Kabogozza Ssemwanga nga yeegwanyiza ekifo ky’ekimu bwe baabadde balambula
enyinyiriri za ttiimu ya Kasokoso Market ne Kasokoso FC ezaatuuse ku fayinolo.
GENERO WA NUP ATANDIKA OLUTALO
Kyokka ba foot Soldiers nga bakulembeddwa ‘Genero’ Biwoti amannya ge amatuufu nga ye Kizza Netherous agambibwa nti ali ku ludda lwa meeya wa Kira aliko Julius Mutebi Nsubuga naye owa NUP, yafunyizza ebikonde n’alumba ba foot Soldiers ba Kabogozza eyeegwanyiza obwa meeya eyabadde alinaanye Ssenyonyi nga kigambibwa gw’akukuta naye NUP gw’eba ewa kkaadi Biwoti n’abafunyiza ebikonde abakube, wabula ba foot Soldiers abaabadde batambulira ku Ssenyonyi ne bamulabuukirira mangu nabo ne bafunya ebikonde eng’uumi n’enyooka. Ba foot Soldiers bangi baavuddewo nga bawulubadde ffeesi kyokka abaserikale abakuuma Ssenyonyi ne bayingirawo nebakwata Genero Biwoti eyatabudde omukolo ne bagenda naye. Kyokka ne mu tenti Ssenyonyi ne banne obwedda mwebatudde emabega obwedda ba Foot Soldiers beekube eng’uumi nga baagala securite ya Ssenyonyi ebaviire bakubagane, embeera eno yaleese obunkenke bungi olw’efujjo eryakoleddwa era baagusambidde mu bunkenke obutagambika.
Empaka gyezaggweredde nga Kasokoso Market ewangudde Kasokoso FC ku goolo 3-0.
SSENYONYI ASUDDEWO OWA NUP AKUKUTA N’EYALI OWA NRM
Ensonda zitubuulidde nti ekimu ku kyaviiriddeko eng’uumi okunyooka, kwe kubeera nga Ssenyonyi akukuta ne Kabogozza ku kifo ky’obwa meeya ekinyiiza abawagizi ba Julius Mutebi alina kkaadi ya NUP nga bagamba nti Kabogozza si ye kandidenti omutuufu okuwagirwa kubanga yaakava mu NRM talina kye yaakoledde kibiina, kyokka n’aba Maiso nabo baatabukidde Ssenyonyi okusuulawo omuntu ayiiriddewo ekibiina omubiri n’akukuta n’ensolima.
More Read
ABA LUKWAGO BAYISIZZAAMU SSENYONYI EGGAALI
Kyokka era ku mukolo guno, abawagizi ne ba Foot Soldiers abagambibwa okubeera aba Jimmy Lukwago eyakwatira NUP bbedendera ku kifo ky’omubaka wa Kira Municipality mu kalulu akawadde baayisizzaamu Ssenyonyi eggaali ne bamulangira obunanfuusi olw’okusuulawo Lukwago eyamubeererawo ennyo mu nsimbi nga tanafuuka mubaka, nga tava mu maka ge e Najjeera ne balya n’okunywa ne banywa ate nga n’emirimu gy’ekibiina agijjumbira kyokka amusuddewo akukuta ne George Musisi gwebagamba nti talina buwagizi mu bantu businga obwa Lukwago ate nga Kira Musisi gyagala okukulembera tagitegeera ekigenda okuwa omubaka aliwo Ibrahim Ssemujju Nganda omukisa okuddamu okwangula.
SSEMUJJU NE MUSISI BAAGALA KWETTA
Mu lutalo lw’okusuuza Ssemujju ekifo, Musisi alukwasizza maanyi tava ku mikolo omuli ennyimbe, emikolo gy’embaga, taggwa kukiikirira bawagizi ba kibiina mu makooti. Kuno agattako okusindika bambega mu nkiiko za Ssemujju abamubbira ebyama ne pulaani za Ssemujju zaapanga. Kyokka waliwo ebifo okuli Kasokoso n’ebirala ebiremye Musisi okutuukamu okwogerako n’abantu n’alemesebwa poliiisi n’abakulembeze mu bitundu ebyo abamu kyebagamba nti Ssemujju yamupangira ne bamugobaganya olw’okuba ebitundu bino Ssemujju gyasinga obuwagizi, kyokka n’abawagizi ba Musisi bwe bagwikiriza Ssemujju ku mikolo nga bamung’oola n’okumulangira okubeera n’omululu mu by’obufuzi nti teyandikomyewo ebisanja bisatu by’amaze ne by’alidde mu palamenti Bimala.
BOBI ABIYINGIDDEMU
Mukwogerako eri abawagizi abaabadde abakambwe, Ssenyonyi yavumiridde ebikolwa ebyakoleddwa ba Foot Soldiers nti ebikolwa eby’effujjo ng’aba NUP tebabikkiririzaamu , ekibiina kyabwe kya mirimbe era ebikolwa ebikoleddwa agenda kubitwala ewa Bobi Wine. Ssenyonyi yasindikidde Bobi amaloobozi n’ebyabadde ku mukolo byonna era mu bwangu Bobi eyabadde naye asuubirwa okubeera ku mukolo n’atasobola olwa akalippagano k’ebidduka, yasinzidde eyo n’aweereza obubaka Ssenyonyi n’abuzanya ku muzindaalo n’avumirira ebikolwa eby’effujjo ebyakoleddwa , n’asaba banna kya NUP okukomya effujjo wabula balwanirire enkyukakyuka mu kalulu akaddako.
Mu lutalo lw’ekifo kya Kira Municipality, NRM nayo eyungudde Daniel Kananura, Bright Nuwagaba, Isaac Ssenkubuge ssentebe wa Bweyogerere Division, Edison Tumwebaze ne Allan Bulamu ssentebe wa LC Naalya Estate.
