• Obujulizi bwanise obufere, obwenzi, obulogo mu Church
OMUWANDIISI w’ekkanisa ya Uganda Rev.Can.Capt William Ogeng akakasizza ONO BWINO nga Ssaabalabirizi Dr. Stephen Kazimba Mugalu essaawa yonna bwagenda okuyita olukiiko lw’abalabirizi (House of Bishops) okulonda omulabirizi agenda okudda mu kifo kya Bishop Dr Henry Katumba Tamale agenda okuwummula oluvanyuma lw’okuweza emyaka egy’essalira 65 kwalina okuwummulira ng’omulabirizi w’Obulabirizi bwa West Buganda.
Ensonda mu kkanisa ya Uganda zitubuulidde nti olukiiko lw’okulonda Omulabirizi wa West Buganda omupya lusuubirwa okutuula wakati wa 20-23, 03, 2025 okukuba akalulu ku mannya 2 agagenda okubaweerezebwa okusalawo adda mu kifo kya Dr Tamale.
BALEESE OBUJULIZI OBUTIISA
Obunkenke bw’amaanyi mu bulabirizi nga bano batandise okuleeta obujulizi obukakasa nti abamu ku bavuganya tebagwanidde nga beenyigira mu bikolobero ebiswaza obukulembeze nga tebasobola kukwasibwa buvunanyizibwa bwakukulembera ndiga za Mukama.
Bano okwemulugunya bakuweerezza Stanley Kawala munnamateeka w’Obulabirizi era akuliddemu akakiiko akasunsula amannya agalina okuwerezebwa mu House of Bishops, abalala batandise n’okuweereza ba Bishop abagenda okulonda omulabirizi omupya obubaka nga babasa okwegendereza amannya g’abaagala ekifo ekyo singa gabeera gasindikiddwayo ng’akakiiko ka Kawalya kawubiddwa.
AMANNYA G’ABALWANIRA OGUFO
Olukiiko lwa Kawalya lwasunsudde Rev. Fr. Can Moses Kayimba, Rev. Fr. Can Herbert Matovu, Ven Can Gaster Nsereko, Ven Can Patrick Ssimbwa, Rev. Fr. Festo Kalungi, Rev, Fr Tebasooke, Rev Fr Samuel Mbogo Matovu ne Rev Fr Nuwagaba.
Obujulizi ONO BWINO bwalabyeko nga buweerezeddwa akakiiko ka Kawalya ne balabirizi banne, bulumiriza nti abamu ku baagala ebifo ebyo basajja benzi wadde nga bafumbo abaakuba ebirayiro mu kkanisa okukuumagana ne bakyala baabwe mu maka.
Omu yaleeta ensasagge mu kkanisa abawala babiri omu nga muyimbi ate omulala nga muwandiisi mu bulabirizi bw’e Namirembe bwe baakubagana empi, okwesika enviiri n’okweyambula sikaati nga buli omu alumiriza munne okumwagalira omusajja.
Abakulu mu bulabirizi ensonga baaziyingiramu omuwala omu n’agobwa ku mulimu era kati yaddukira ku kyeyo.Omulala bamulumiriza nti ng’akolera e Ssembabule, yabulankanya ssente ezaali zisindikiddwa gavumenti okukulaakulanya essomero kweyali atuula ku lukiiko olufuzi, omugenzi Dr. Kefa Kamya ye yamutaasa obutasibwa wadde ng’omukulu w’essomero gwe yeekobaana naye yasibwa.
Omulala yasigula muk’omusajja omufumbo n’amuzaalamu omwana ekintu ekyasattulula obufumbo bw’omukyala n’addaayo ewaabwe, olwazala munnaddiini ono yagaana okulabirira omwana n’afa. Aba famire balumiriza nti ndya mbi ye yamutta ng’omwana yaziikibwa ku lusalosalo ewaabwe w’omukazi oluvanyuma lw’omusajja okumwegaana.
Omulala bamulumiriza okwekobaana n’obukulembeze bw’obulabirizi bwa West Buganda okubulankanya ssente Dr Tamale n’amutaasa obutagobwa mu buweereza.
Rev. Can. Abel Meerewooma Sserwanja mu mboozi ey’akafubo ne ONO BWINO bweyali ataddeyo okusaba kwe okuvuganya ku kifo ky’Obulabirizi bw’e Luwero, yatubuulira nti byeyalaba bannaddiini banne bakola yakakasa nti batono ku bo abagenda okugenda mu Ggulu okusisinkana Katonda waabwe.
Ono alumiriza nti mu kuvuganya ng’okugenda mu maaso mu West Buganda, bannaddiini abamu bagenda ne mu masabo okusaba bajjajja okubawa emikisa n’amaanyi okusobola okuwangula ate nga mu kkanisa bakubiriza abakkiriza okwewala ebikolwa bya kalogokalenzi.
Dr Tamale yasaba Abakulisitayo mu bulabirizi bw’akyakulembera okwesabira enyo okulaba ng’emivuyo egyali mu kulonda omulabirizi w’e Luwero ne Namirembe -Rt. Rev. Moses Banja obutalabikira waabwe.
Omusika wa Dr. Tamale asuubirwa okutuuzibwa mu kifo kino nga 3/03/2025 ku mukolo ogusuubirwa okubeera ku lutikko y’e Kako e Masaka.
