- Abajaasi basonze ku bakyala ba Besigye be bagenda okusiba olw’okubalabisa
BRIG. GEN ROBERT FREEMAN MUGABE akulira kkooti y’amagye e Makindye, yawuniikiridde ne banne Dr Kizza Besigye bweyakakasizza nga bweyawa ebiragiro balooya bonna abalabika mu kkooti eno okumukiikirira mu misango gy’okugezaako okukozesa eryanyi okuggyako gavumenti ya pulezidenti Museveni.
Wiiki ewedde, Besigye n’omuyambiwe Hajji Obed Kamulegeya Lutale bwe bavunaanwa bwe baalabiseko mu kkooti okugenda mu maaso n’okuwuliriza emisango egyabaggulwako oluvanyuma lw’okukwatibwa e Kenya, omuwaabi wa kkooti yamagye Col. Raphael Mugisha ye yasooka okusaba omulamuzi Brig Gen Mugabe obutakkiriza ttiimu ya bannamateeka eyabadde ekulembeddwamu omukazi omukambwe Marth Karua Munnakenya, Omuloodi wa Kampala Ssaalongo Erias Lukwago n’abalala ng’alumiriza nti beefuula kyebatali kubanga Dr Besigye tabawanga ku lukusa okumukiikirira mu misango egyamuggulwako.
Col Mugisha eyabadde awagirwa Brig. Richard Tukacungurwa omuwabuzi omukulu owa kkooti y’amagye ng’alumiriza nti mu kkooti balina ekiwandiiko ekyateekebwako omukono gwa Dr Besigye ng’alonda balooya okuli Ernest Kalibbala, Fredrick Mpanga ne Chrysostom Katumba okuva mu kampuni ya bannamateeka eya AF Mpanga and Company Advocates okumukiikirira mu musango guno.
Karua eyabadde yaakafuna ebbaluwa emukkiriza okuwolereza Dr Besigye mu kkooti y’amagye okuva mu kakiiko k’omulamuzi Irene Mulyagonja aka Uganda Law Council -ULC, yataddewo embeera n’anyonyola Brig Gen Mugabe nti balooya bonna abaabadde mu kkooti balina ebiragiro okuva ewa Dr Besigye okumuwolereza na’mukakasa nti balina ttiimu nnene okuva mu mawanga amalala erindiridde ebiragiro bya Besigye okumuwolereza.
More Read
Brig Gen Mugabe yabuuzizza Besigye oba akkiriziganya n’ebyabadde byogerwa Karua n’amukakasa nti balooya bonna okuli ne munnamagye eyawummula Maj Ronald Iduuli, balina ebiragiro okumukikirira mu misango gyonna gye baamuggulako ng’akakasa nti mifu ate nga ye omuntu wa bulijjo talina kuvunaanibwa mu kkooti yaabwe.
AKULIRA KKOOTI Y’AMAGYE YASOBEDDWA
Mugabe yalabise ng’asobeddwa nga wano Brig Gen Tukacungurwa yatadde ku nninga Besigye anyonyole lwaki teyawandiika mu butongole okukakasa nti Karua y’agenda okumukiikirira mu misango egyamuggulwako nga bweyakola ku Kalibbala ne banne n’anyonyola nti abasibe bonna abavunanwa mu kkooti y’amagye balina okuwandiika okulaga balooya abagenda okubakiikirira nga bwe babeera tebalina olwo kkooti n’ebawa abaayo abasasulwa gavumenti okubawolereza.
BYANYIMA TABIKKIRIZZA
Obukambwe Besigye bweyalaze bwakanze Mugabe n’akkiriza Karua ne banne okutandika okuwolereza Besigye ng’ensonda mu balooya zitubuulidde nti Byanyima takkaanya na ngeri Besigye gyayagala omusango gutambulemu ng’atya nti engeri gy’akaddiye mu myaka ng’agenda kuweza myaka 70, ayinza okufunira obulwadde mu kkomera obukambwe obuyinza okumuviirako okufa nga mutowe Joseph Musasizi Kifefe n’omubaka wa Kawempe North Muhammad Ssegirinya abazze bafa ng’abantu baabwe bagamba obulwadde buva mu makomera gye babasibira ku misango gy’ebyobufuzi.
Ensonda zitubuulidde nti mu biseera bya ssekukulu, Byanyima yeegayirira Besigye okuteeka omukono ku biwandiiko ebiwa Kalibbala ne banne olukusa okumukiikirira ng’ono oluvanyuma yabawa ebiragiro okulwana enyo okulaba nga basabira Besigye okweyimirirwa awoze ng’ava wabweru w’ekkomera.
Ensonda zongeddeko nti eby’okumusabira okweyimirirwa yalagidde balooya be obutakikola ng’alumiriza nti bwebakikola bagenda kuba bayongedde okukakasa nti kkooti y’amagye erina olukusa okuwozesa abantu ba bulijjo ekintu kyabadde alwanyisa okuva bweyatondebwawo.
Byanyima yakakasa dda nga bwayagala okusisinkana Museveni amunyonyole nti abantu nga Besigye okumuvuganya tekibafuula balabe be atuuke n’okubaggulako emisango nga ebibonerezo byagyo kubeera kuttibwa nga ONO BWINO talina bukakafu oba Byanyima yasaba okusisinkana Museveni okwogera.
BESIGYE BAMUTADDEKO OMUSAJJA OMULALA
Bino webibeereddewo ng’oludda oluwaabi lwagasse Capt Denis Ola omujaasi mu kibinja ky’eggye lya ttanka ku fayiro ya Dr Besigye nga balumiriza nti yasuula obwesigwa gavumenti ya pulezidenti Museveni bweyamuteekamu n’akukuta n’abantu abaagala okuggyako gavumenti nga yatuuka n’okubagabira ebyama ebitalina kusasanyizibwa era okukikola yateeka ebyokwerinda by’eggwanga mu katyabaga.
Capt Ola emisango yagyegaanye ng’awolerezebwa looya wa gavumenti, Erias Nalukoola omu ku balooya ba Dr Besigye ategeezezza kkooti nti ono baamugasse ku fayiro ya Besigye okuyamba oludda oluwaabi okunyweza omusango gwabwe okuvunaanira Besigye ne Lutale mu kkooti y’amagye.
Balooya ba Besigye balina okutya nti Capt Ola ayinza okukkiriza emisango nga bwegwali ku misango egyaggulwa ku Bobi Young omu ku bawagizi ba pulezidenti wa NUP Bobi, bwe baamuggulako emisango n’abajaasi babiri abakkiriza emisango fayiro n’agisigalako yekka nga bayinza n’okumukozesa okuwa obujulizi obufu ku Besigye.
ENSALA YA KKOOTI EBADDE ERINDIRIDDWA EGENDA KUWEEBWA
Ensonda zitubuulidde nti obunkenke bwamanyi mu kkooti yamagye oluvanyuma lw’okukitegeera nti essaawa yonna ssaabalamuzi Owiny Dollo agenda kukulemberamu balamuzi banne mu kkooti ensukkulumu okuwa ensala mu kujulira kwa ssaabawolereza wa gavumenti Kiryowa Kiwanuka kweyakola ng’awakanya okusalawo kwa kkooti etaputa ssemateeka eyawera okuwozesa abantu ba bulijjo nga Besigye mu kkooti y’amagye.
Ensonda mu kkooti zirumiriza nti ensala yawedde okuwandiikwa era essaawa yonna abalamuzi bagenda kugisoma nga basuubirwa okukakasa ekyasalwawo kkooti y’amagye obutawozesa bantu ba bulijjo wabula eyinza okuteekamu akakwakkulizo nti omusango bwegutwalibwayo omuntu wa bulijjo nga yeekobaanye n’omujaasi olwo abeera alina okuvunaanibwa.
KKOOTI EWAGA KUSIBA BAKAZI BA BESIGYE
Ensonda mu kkooti y’amagye zitukakasiza nti oluvanyuma lw’okusiba Eron Kizza omu ku balooya ba Besigye abatasaaga emyezi 9 e Kitalya nga bamusingisiza emisango gy’okuyisa olugaayu mu kkooti, Brig Gen Mugabe ne banne beewera okusiba abalala.
Bano okusinga beeweredde nyo Ingrid Turinawe mukwano gwa Dr Besigye ng’ono bamulumiriza nti akubira obukule n’okusooza nga bwasonga enwe n’okuziimuula abajaasi ba kkooti eno.
Abalala kuliko eyali akulira oludda oluvuganya mu palamenti Winnie Kizza nga balumiriza nti asonga songa nyo engalo n’okuwakanya ebisaliddwawo kkooti yaabwe.
Doreen Nyanjura omumyuka w’Omuloodi wa Kampala naye abakulu mu kkooti eno bamwewerera nga baagala kumusiba ne banne okuli Harold Kaija ssaabawandiisi w’ekisinde ky’ebyobufuzi ki People’s Front for Transition (PPF) nga ono bamulanga kukulemberamu bantu ku kkooti ne bayimba ennyimba eziwaana Besigye n’okutyoboola kkooti.
Mugabe yategeezezza kkooti nti ensonga lwaki banyweza ebyokwerinda ennaku Besigye zaatwalibwayo babeera batya nti abawagizi be bayinza okubakolako obulabe ng’obujulizi buno baabufuna okuva ku Lukwago abeera ku mikutu gy’amawulire ng’awaga nga bwe bagenda okukozesa omusango gwa Besigye okusanyaawo kkooti y’amagye eyateekebwawo mu mateeka ekintu kyebatasobola kutwala ng’ekyokusaaga.
Lukwago abuulidde kkooti nti obunkenke obwateereddwawo kkooti n’etuuka n’okusiba Kizza balooya ba Besigye bangi ababadde baagala okumuwolereza batidde ne basigala kuwa buwi balooya abagumu nga ye ne Karua amagezi ekintu ekiswaza kkooti erina okugaba obwenkanya.
