- Bakalintalo n’abakutuzi ba ddiiru bamulabudde okumufulumya nga talinnya
HO! Nnankulu wa KCCA omupya, Hajjati Sharifah Buzeki atabuse bw’agaanye okuyingira ofiisi nga tebanafulumya bintu by’abo be yaddidde mu bigere Frank Rusa Nyakaana ne Dorothy Kisaka bye baalekamu.
Buzeki yaggyiddwa mu kitongole ekivunanyizibwa ku bakozi ba gavumenti (public Service) gyabadde akola nga kamisona akulira abakozi, ate omumyuka we Benon Kigenyi yabadde akola mu mukago gwa East African Community gyabadde akola ng’omuwandiisi.Bano baakwasiddwa ofiisi ku mukolo ogwabadde ku City Hall, bazze mu bigere bya Dorothy Kisaka ne Ying. David Luyimbaazi Sali pulezidenti Museveni beyagoba olw’okulagajjalira kasasiro w’e Kiteezi eyabumbulukuka n’atta abantu abasoba mu 35 n’okusuula amayumba g’abatuuze. Kisaka ne Luyimbaazi baggulibwako emisango gy’okutta abantu mu butali bugenderevu mu kkooti e Kasangati ne basindikibwa mu kkomera e Luzira wabula ne bayimbulwa ku kakalu ka kkooti nga kati bawoza bava bweru.
Omukolo gw’okukwasa Buzeki ne Kigenyi ofiisi, gwabadde ku City Hall mu kisenge ekimanyiddwa nga Lord Mayors Parlour nga gwakuliddwa akulira ekitongole ekitwala abakozi ba gavumenti Lucy Nakyobe, Minisita wa Kampala Minsa Kabanda n’omumyuka we Kabuye Kyofatogabye, loodi meeya Erias Lukwago ne bameeya b’amagombolola agakola Kampala.
HAJJATI AYOGEDDE BY’ASOOKERAKO
Ng’amalirizza okulayira, Buzeki yategeezezza nti agenda kusooka kunoonya ttaka ewagenda okuyiibwa kasasiro w’omu Kampala, asisinkane banna Kampala abakola emirimu egyenjawulo boogerezeganye amanye ebizibu ebibaluma.
LWAKI HAJJATI BUZEKI AGAANYE OKUYINGIRA OFIISI
Ensonda mu KCCCA zitutegeezezza nti Buzeki olwamaze okulayira n’okukwasibwa ffayiro za ofiisi, yalagidde ebintu byonna omuli kapeti, emmeeza, entebe ebiri mu ofiisi byonna bijjibwemu bamuteeremu ebipya ne ofiisi bagisiigemu langi endala buli kimu kibeere kipya kubanga naye mupya, ofiisi ajiyingire bulungi. Wabula ate ye omumyuka we Kigenyi obutafaananako ne mukama we, olwakwasiddwa ofiisi entebe, yagendeddewo mu ofiisi n’awera okukola byonna ebyalema Luyimbaazi teyatidde byakirogo.
More Read
ATIDDE EDDOGO?
Kyofatogabye yalumiriza Kisaka n’eyali omumyuka we Luyimbazi okuleeta ebigambibwa okuba eddogo ku City Hall banyweze emirimu gyabwe oluvannyuma lwa kasasiro w’e Kiteezi okubumbulukuka, kubanga baakitegeera nti kigenda kubaviirako okufirwa ofiisi zaabwe kyokka ebigambibwa okubeera eddogo tebyakola ne bagobebwa.
Ebikolwa by’obulogo byalabibwako ne mu ofiisi za badayirekita ba KCCA kontulakiti zaabwe ezaali ziweddeko nga kigambibwa nti bano baaleeta endeku ne baziteeka mu nsonda mu ofiisi mwe batuula nga balowooza nti we banaaloga ekitongole ekivunanyizibwa ku bakozi ba gavumenti kijja kubongera kontulakiti empya ate abalala baali baloga balinnyisibwe amadaala bave mu bifo mwebali babongere ebifo ebinene.
RUSA NAYE YATYA EDDOGO LYA KISAKA NE LUYIMBAAZI
Abadde akulira akulira KCCA ow’ekiseera Frank Rusa weyali aweereddwa ofiisi, yagaana okugiyingira okutuusa weyaggyamu obuziina bwa Kisaka omwali entebe, emmeeza, kapeti n’ateekemu ebipya kwabadde akolera emirimu gye. Rusa era abadde yaleeta ttiimu y’abasumba b’Abalokole beyawa akamu ku busenge ku City Hall ababadde basula nga basaba essaala enkambwe nga bagamba bagoba mizimu ku City Hall egiremesa abanene okukola obulungi emirimu, okusaba kuno kubaddengawo buli lunaku akawungeezi.
AB’ENTALO BATANDISE OKUKUBA HAJJATI
Lukwago amanyiddwa ennyo okutabuka na buli akulira KCCA Museveni gw’abeera alonze, alabudde Buzeki n’omumyuka we Kigenyi nti tasobola kubayozayoza nti bagudde mu gafo kubanga entebe mwe batudde eyokya ate erimu embalabaasa eruma. Lukwago yayongerako nti Buzeki baamuwadde kikompe kyabutwa ng’ayolekedde akaseera akazibu. Yabasabye obutayingirira mirimu gye ng’ababadde bakulira KCCA bwe bazze bakola okuli Jennifer Musisi ne Dorothy Kisaka.
Ate sipiiika wa KCCA Zaharah Luyirika alabudde Buzeki nti naye bw’aba azze n’omululu gw’okuvulubana omusimbi ng’ayita mu ddiiru bagenda kumuyisa bubi kubanga bakooye abakulira KCCA abaluvu abekkusa bokka ne balemwa okukolera banna Kampala.
Luyirika ategeezezza nti mu kisanja kya Kisaka ne Luyimbaazi tewali kyakolebwa kubanga baasiiba bakubagana bikonde mu kkanso olw’oludda lw’ekikugu ku City Hall okulemera kontulakiti z’enguudo kanso zeyali yasaba etunulemu kubanga zaalimu ebirumira olw’omuwendo gwa ssente abanene ze baaduumuula.
ABAKUTUZI BA DDIRU BATANDISE OKWETOLOOLA BUZEKI
Ensonda zitubuulidde nti waliwo ebiwayi bya banna byabufuzi omuli ne bakkansala ku KCCA abaatuukiridde Buzeki ne bamussa ku nninga nga baagala bamuguze ekirowoozo awe ezimu ku kampuni zaabwe eziri mu bitundu bye bakiirira emirimu gy’okulungoosa emyala n’okwera enguudo z’omu Kampala nga balowooza nti singa kampuni zaabwe ziweebwe ttenda zino, bajja kuyoola omusimbi gwe banaakozesa mu kalulu.
AMASANNYALAZE GATABUDDE AB’OMU OWINO
Kigambibwa nti waliwo ekiyiwa ky’abakulembeze mu katale ka St Balikuddembe abakulembeddwa Richard Mukalazi akola ng’omwogezi w’abasuubuzi mu katale kano abaasazeeko Buzeki nga baagala agobe akabinja akaakwasibwa obuvunanyizibwa okusolooza abasuubuzi amasanyalaze ateekewo ekibinja kabawe. Mukalazi ne banne balumirizza maneja w’obutale bwa Kampala Julius Kasirye okubeera emabega w’akabinja akabasolooza ssente z’amasanyalaze eziyitiridde ne bazigabana ekiviiriddeko abasuubuzi okukubagana ebikonde.
KCCA EYOGEDDE: Omwogezi wa KCCA Daniel Nuwabine agambye ONO BWINO nti buli muntu alina obulombolombo bw’akkiririzaamu n’olwekyo tebasobola kugaana Hajjati kyasazeewo wekiba ng’ekyokukyusa ofiisi kye kimuwa emirembe bagenda kukikola.
