OMUBAKA w’e Lwemiyaga Theodore Ssekikubo olwawanguddwa mu kamyufu ka NRM ku kifo ekyo okukwatira ekibiina bwendera mu kalulu ka 2026, n’alabula mukamawe pulezidenti Museveni nti effujjo eryayoleseddwa mu kalulu kano akimanye nti abalikoze ye gwe bagenda okufundikira naye oluvanyuma lw’okulikozesa okusuula abo bonna be balowooza nti be babadde babagambako.
Ssekikubo yawanguddwa munnamagye eyawummula Brig. Gen Emmanuel Rwashande ng’awagirwa banne okwabadde Maj Gen Phinehas Katirima ssentebbe wa NRM mu disitulikiti y’e Ssembabule ne baganda ba pulezidenti Museveni abaakulembeddwamu Michael Nuwagira abasinga gwebamanyi nga Toyota ne bannakisinde kya Patriotic League of Uganda (PLU) abaategeezezza nti okuwangulwa kwa Ssekikubo ne Barnabas Tinkasimire e Buyaga mu Bunyoro bwabadde buwanguzi bw’amaanyi gyebali.
WALIWO OLUKWE OKUWAMBA M7?
Ahmed Kateregga Musaazi RDC w’e Butambala yalabudde nti waliwo abantu abapya abaakayingira NRM abataddewo embeera y’okukozesa effujjo ne ssente enyingi ekibaleetedde okubeekengera nga balowooza nti bayinza okubeera n’ebigendererwa by’okuwamba ssentebe waabwe era pulezidenti wa Uganda Museveni.
Ono awagiddwa omumyuka w’omwogezi wa pulezidenti era omuyambiwe ow’enjawulo okumukungira obuwagizi mu bitundu by’e Busoga Hajji Faruk Kirunda eyategeezezza nga bwe yeewuliriddeko ng’abamu ku baakuliddemu okulondesa mu kamyufu ka NRM nga bakkiriza nti ddala waliwo abanene ababataddeko eryanyi nga baagala bakyuse ebyavudde mukulonda balangiriremu abantu baabwe be ababadde bawagira era olwokuba tebaabadde na kyakukola bakkirizza ebyabalagiddwa.
Kirunda yeebuuza ekigendererwa ky’abantu bano okweyingiza mu kalulu ka NRM ne batuuka n’okuwaliriza abakulira ebyokulonda okukyusa obuwanguzi bw’abantu be baagala n’ategeeza nti bayinza okubeera n’ekigendererwa ky’okuwamba Museveni nga yasabye ebitongole bya bambega n’ebinonyereza bonna bibanonyerezeeko oluvanyuma basibwe mu makomera nga bwe baakoze ku baakuliddemu okulondesa mu NRM.
Hajjat Hadijja Namyalo akulira ofiisi ya ssentebe wa NRM e Kyambogo ategeezezza nti abanene mu securite okweyingiza mu byokulonda balina ekigendererwa ky’okuwamba Museveni nga bakola effujjo ku balonzi bamukyawe naddala mu bitundu bya Buganda ne Busoga.
Ono ategeezezza nga byonna byeyazudde ebyakoleddwa abanene mu securite nga batiisatiisa abalonzi, okukyusa ebivudde mu kalulu bweyabiroopye edda ewa pulezidenti n’amukakasa nti bye baamulimbye nti abantu beetabye bangi mu kalulu ka NRM naddala mu Buganda si bituufu.
BAAGALA KUKOZESA KAKODYO KA MBABAZI
Ensonda mu NRM zitubuulidde nti waliwo abanene abapanga okusuula gavumenti ya Museveni nga bakozesa NRM, akakodyo kano eyali ssaabaminisita John Patrick Amama Mbabazi keyali akozesezza wakati wa 2011 okutuuka mu 2015 Museveni bweyamugobera.
Ono baamulumiriza okubeera ne pulaani ewanguza abantu bonna ebifo by’obukulembeze munda mu kibiina olwo bwe batuuka mu Ttabamiruka bayise ekiteeso ekisemba okusiima obukulembeze bwa Museveni n’okumusaba awummule nga kino bwakigaana okukikkiriza olwo bamusindike mu kalulu avuganye ne Mbabazi eyali akimanyi nti yali Museveni amuwangula.
M7 YASATTIRA
Ensonda zongeddeko nti pulaani eno yatiisa nnyo Museveni kwekulagira okukola enongosereza mu ssemateeka wa NRM abeere nga y’alonda abakulembeze abatambuza ekibiina nga ssabawandiisi, omumyukawe, akulira akakiiko k’ebyokulonda n’ebifo ebirala ng’atya omuntu yenna okukozesa ekifo kye nga Mbabazi bweyakozesa ekya ssabawandiisi w’ekibiina okumuyeekera.
Muhammad Muwanga Kivumbi omubaka w’e Butambala ategeezezza nti Museveni yenyini ye yali yamatiza Mbabazi nti mu 2016 agenda kuwummula n’amuwa n’olukusa okutegeka gavumenti gyagenda okukola nayo nti okutandika okumuyeekera yamala kukizuula nti amuliddemu olukwe.
Kivumbi ayongeddeko nti Museveni yayita Mbabazi mu 2015 n’amutegeeza nga bwategedde byonna byabadde apanga n’amwatulira nga bweyali agenda okuddamu okwesimbawo ekintu ekyayongera okunyogoza Mbabazi nga bwamubuuza nti naye yali yamusuubiza okumukwasa mu kintu.
Mbabazi yeewunya nga bamaze okukkaanya ne Museveni okusigala nga bakolera wamu wadde nga yali amuliddemu olukwe ate okumugoba nga ebyokumugoba yabitegeerera mawulire nga eno yeemu ku nsonga lwaki talimusonyiwa.
Omubaka Moses Kabuusu yategeeza nti ebiseera ebisinga abagagga bateeka ssente mu bannabyabufuzi naddala ababaka ba palamenti ng’ekigendererwa kyabwe kwekubeera nga be babafuga nga ne bwe baleetebwako obujulizi obukambwe ku bufere bwebabeera bakoze mu ddiiru za gavumenti bakozesa babaka abo okubataasa.
Ono yategeeza nti ye okuwangulwa mu kalulu ka 2016, waliwo abanene mu gavumenti beyagaana okuyisizaawo ddiiru zaabwe ez’obufere mu palamenti ne bagenda e Kyamuswa gyakiikirira ne bamulwanyisa okutuusa bwe baamusuula nga yakakasa nti munsi yonna akakodyo kano bamafiya bakakozesa okufuga zigavumenti.
Mike Mukula alwana okukiikirira ekitundu kya Eastern Region ku lukiiko lwa CEC ya NRM, alumiriza nti nga oggyeko ssente abanene mu gavumenti n’abagagga zebatadde mu beesimbyewo, waliwo ezivudde wabweru w’eggwanga ekintu eky’obulabe enyo nga abagagga abo baagala okukozesa abo be bawadde ssente okusalirawo Uganda n’okwezza ddiiru zonna ensava.
BAABANO ABASALAWO AWANGULA N’AGWA
ONO BWINO olwaleero akuleetedde abanene mu NRM be balumiriza okubeera nga be baasazeewo eyawangudde mu kamyufu kaabwe.
Wabula akulira akakiiko k’ebyokulonda mu NRM Dr Tanga Odoi, Museveni gweyaganye okuddamu okwetegereza ensobi ezaakoleddwa mu kalulu ategeezezza nti obukiiko nga akaatereddwawo buteekebwawo okukkakkanya obusungu bw’abaawanguddwa naye nga tasuubira ky’amaanyi kigenda kukolebwawo.
GEN MUHOOZI KAYINERUGABA
Ono yategeezezza nti ye ne banne bamaze emyaka 10 nga bapanga obuwanguzi obwatuukiddwako bannakisinde kya PLU mu kamyufu ka NRM nanyonyola nti PLU ky’ekibinja ky’abavubuka ba NRM abalindiridde okutwala obuyinza ng’abakadde bawummudde.
Ono yeewanye nga bweyabadde n’omukono ogw’amaanyi mu kuwangulwa kwa Ssekikubo ne Tinkasimire n’abagamba nti omulimu kati gwebasigalidde okukola kwekumukubira eddagala engatto z’ayambala n’okuzisiba obuguwa.
ABA MUHOOZI ABAAWANGUDDE MU KAMYUFU
Ssabawandiisi wa PLU David Kabanda nga ye yawangudde fulaaga ku kifo ky’omubaka wa Kasambya e Mubende ategeezezza nti abantu baabwe abasinga be baasimbyewo baawangudde nga bano kuliko Peter Ogwang minisita omubeezi ow’ebyemizannyo.
Abalala kuliko Haruna Kasolo, Jackson Atim, Francis Odome, Dr Jane Ruth Acheng, Martin Ojara Mapenduzi, Joseph Kakooza n’abalala bangi.
Muhoozi okubeera omuduumizi w’amagye, mutabani wa pulezidenti Museveni, ssente byamuyambye nyo okuwanguza abantu be mu bulungi ne mu bubi.
ANNET ANITA AMONG
Ono bamwesibako nyo nti yawadde ebiragiro ebyawanguzza abantu be naddala mu bitundu bya Busoga, Buganda, Teso nga bino by’ebitundu byayagala okumuyamba okuggusa olutalo lw’okugoba omumyuka wa ssaabaminisita asooka era minisita wa East Africa Rebecca Alitwala Kadaga mu byobufuzi.
TTIIMU YA AMONG
Abamu ku beyayambye okuyitamu kuliko Mariam Naigaga e Namutumba, omwamiwe Moses Magogo, Muhammad Ssentayi, Kibedi Nsegumire n’abalala.
Among ayogerwako mu kiseera kino nga munnabyabufuzi alina ssente enyingi nga bangi ababadde beesimbyewo ye yabawadde sente za kampeyini nga kyayagala bawangule basobole okumulonda ku kifo ky’okukiikirira abakyala ku lukiiko lwa NRM olw’oku ntikko olwa Central Executive Committee (CEC) mu ttabamiruka waabwe omwezi ogujja.
OMUKO ODREK RWABWOGO
Ono eyawasa om uku bawala ba Museveni, bamulumiriza nti ye yaviiriddeko okukyusa RDC w’e Rwempala Harriet Nakamya ng’entabwe yavudde ku kugaana kuteekesa mu nkola biragiro byeyamuwadde.
Rwabwogo nga mukoddomi wa Museveni, bamulumiriza nti yakubidde Nakamya essimu n’amulagira okunyweza ebyokwerinda by’omuntu we Molly Asiimwe abadde omubaka omukyala ow’e Rwampala eyabadde awanguddwa Annah Kansiime n’agaana ng’amutegeeza nga bwatamumanyi nga omu ku bakama be abalina okumuwa ebiragiro ekintu ekyanyiizizza enyo Rwabwogo n’alagira mu bwangu bamukyuse.
Ensonda zitubuulidde nti Rwabwogo yatadde ssente nyingi mu beesimbyewo mu Ankole ne Buganda era abasinga baawangudde.
JOHN MUSINGUZI RUJOKI
Akulira URA ono bamulumiriza okuteeka ssente mu ababadde besimbyewo mu bintu by’Ankole naddala mwanyina Ruth Rujoki Mushabe eyawangudde ekifo ky’omubaka omukyala owa disitulikiti y’e Kiruhura.
Rujoki akulira ekitongole kya URA ekisolooza omusolo bamulumiriza okukozesa ofiisi ye okunyigiriza ababadde bavuganya mwanyina.
REBECCA ALITWALA KADAGA
Ono teyakozesezza sente nyingi mu kalulu wabula olw’okuba abantu b’e Busoga babamatiza nti waliwo olukwe Among lwaluse okumujja mu byobufuzi okunafuya ekintundu kyabwe, bangi basazeewo okuwagira abantu bokka abawagira Kadaga. Eno ye nsonga lwaki ababaka nga Brandon Kintu e Kagoma yayitidde ku lugwanyu okuwangulwa.
Kadaga akyalwana okulaba ng’abantu be abaawanguddwa nga minisita omubeezi ow’ebyamayumba Persis Namuganza nga balangirirwa ku buwanguzi nga baatutte dda okwemulugunya kwabwe mu kakiiko akaateereddwawo pulezidenti nga balumiriza nti Among yabadde n’omukono mu kuwangulwa kwa Namuganza.
MINSA KABANDA
Ono yabadde n’omukono gwamanyi nyo okulaba nga bonna abatamukkiririzaamu mu Kampala tebawangula kalulu. Abamu ku baawanguddwa mulimu ne Musoke Nagenda eyamukolako lipooti embi ewa pulezidenti ng’amulumiriza okwenyigira mu mivuyo gy’abasuubuzi mu Kampala.
Okutya amaanyi ga Kabanda mu kamyufu ka NRM ye nsonga lwaki Suzan Kushaba eyali akulira akatale ka Owino yatya okukayingiramu wadde ng’ayagala okumuvuganya ku kifo ky’omubaka wa Kampala Central kyeyayitamu nga tavuganyiziddwa.
MOSES KARIISA KARANGWA
Balumiriza nti singa teyabadde Karangwa, Andrew Muwonge yabadde tawangula fulaga ya NRM ku kifo kya ssentebe wa disitulikiti y’e Kayunga.
Karangwa yayambye bannabyabufuzi bangi okuwangula fulaga ya NRM mu disitulikiti okuli Kayunga, Buikwe, Mukono ne Jinja ng’abateekamu ssente.
