- • Basonze ku munadiini eyasiga ensigo y’obufere mu Church
OMU ku baweereza ku lutikko y’e Namirembe eya St. Paul Cathedral, atukakasizza nti maama wa Buganda Sylvia Nagginda Luswata yeetondedde Omulabirizi w’e Namirembe Rt.Rev Moses Banja olw’okukolagana ne Rev.Abel Sserwanja Mereewooma gweyagobye olw’okugingirira empapula z’obuyigirize nga n’abamu bagamba nti omusajja abadde ‘mufere’ nga tebamanyi.
Ono atubuulidde nti Naabagereka yalumbye Banja mu ofiisi ye e Namirembe ng’okusaba kwa Ssekukkulu kuwedde ng’ayagala yeegayirire Banja addiremu Mereewooma kubanga ekkanisa etambulira mu kusonyiwa n’okumanya obuzibu obuli wakati we ne Meerewooma obutadde ekkanisa mu kifaananyi ekibi.
Wabula Banja eky’okusonyiwa Merewooma yakigaanye n’ategeeza Naabagereka nti Mereewooma yagaana okukkirizza ensobi ze nti talina mpapula kyokka n’alemerako nti alina empapula z’ obuyigirize.Banja yakubye fayiro y’emisango ku mmeeza mu maaso ga Naabagereka ekkanisa gy’evunaana Merewooma okuli okujingirira empapula z’obuyigirize ekyaviiriddeko University ya Uganda Christian University -UCU okusazaamu Dipuloma y’ebyeddiini gyeyamuwa oluvannyuma lw’okukizuula nti empapula ez’obuyigirize kweyafunira ekifo ky’obusumba zaali njingirire.
MERE ABADDE AGGYA SSENTE KU NDIGA?
Ekkanisa erumiriza Mereewoma okuggya ssente ku Bakurisitaayo b’e Kitegomba nti za kupangisa nnyumba kubanga ennyumba y’obusumba ku kkanisa eno Merewooma yagimenya nga yaakatuukayo kyokka enyumba abadde asula mu yiye ze babadde bamuwa n’azezza. Avunaanibwa omusango gw’okuvvoola omulabirizi Banja ng’ayita mu mawulire ekintu ekibadde kinyiiza ennyo Banja.
More Read
Banja yanyonyodde Naabagereka nti ebbaluwa eyimiriza Mereewooma yawandikiddwa omuwandiisi w’obulabirizi bw’e Namirembe Canon Henry Ssegawa mu November wa 2024 era Mereewooma n’ayitibwa ne famire ye ne bamubuulira ensonga lwaki agobeddwa kubanga obulabirizi bwamuwa (Mereewooma) obudde aleete ebiwandiiko ebituufu byagamba nti abirina n’alemerwa ebbaluwa kweyayingirira mu buweereza n’esazibwamu ekyategeeza nti talina bisanyizo kuddamu kuweerereza mu kkanisa ya Uganda yonna.
NAABAGEREKA YEETONDERA BANJA: NSONYIWA MBADDE NKOLAGANA N’OMUNTU GWESIMANYI
Fayiro y’e misango egivunanibwa Mereewooma yawalirizza Nabagereka okwetondera Banja n’ategeeza nti abadde takimanyi nti omusumba gwawolereza tasaanidde kyokka nga y’abadde akulemberamu okusaba ku kkanisa e Kireka Naabagereka gy’atera okusabira, era n’akkaanya ne Banja ku ky’okugoba Mereewooma. Banja weyali yaakalya ekifo ky’omulabirizi w’e Namirembe yawera nti agenda kugogola Namirembe aggyewo obulyake, obuli bw’enguzi n’emize egitalaga bwerufu mu baawabule n’ababuulizi mu kkanisa.
LWAKI NABAGEREKA ABADDE AFIIRA KU MAREWOOMA?
Merewooma weyasindikibwa ku kkanisa ya St. Stephens e Kireka mu Bussaabadinkoni bw’e Luzira yatandikira mu kulongoosa kkanisa eyo n’agiteeka ku mutindo, kino wekyaggwa n’alumba Naabagereka eyali tasabirangako mu kkanisa eno ng’asabira Namirembe n’amusaba atandike okusabira e Kireka ekintu Maama Naabagereka kyeyakola.
Enkolagana ya Naabagereka ne Mere yeeyongera Nabagereka weyayita Mereewooma okubasabiranga buli Lwakusatu akawungeezi mu Lubiri Kireka. Okumanya enkolagana yagenda wala, ne mu katabo ke, ‘The Naabagereka Queen Sylvia Nagginda Luswata’ keyatongoza mu 2023 ku Sheraton Hotel yamuwandikako ng’ensulo y’essuubi lye.
BASONZE KU DDIIRU EZ’OBUWUMBI EZITABULA BANJA NE MEREEWOOMA
Ensonda ku kkanisa ya St Stephens e Kireka, zitegeezezza ONO BWINO nti Merewooma olwamala okutereeza ekkanisa ng’agirongoosezza yonna etemagana, yasalawo ng’ali n’Abakurisitaayo bayooyoote essomero lya St Stephens Primary School eriri ku musingi gw’ekkanisa lituuke ku ddaala eryegombesa ekirowoozo kino baakituusa ku lukiiko olufuzi olwali lufuga essomero nga lukulemberwa Moses Banja mu kiseera ekyo eyali Canon, kyokka ekiteeso kino Banja n’akigoba.
Ensonda zongeddeko nti Abakurisitaayo baddamu ne bafuna ekirowooza ekirala eky’okuzimba ekizimbe ky’amaduuka agasoba mu 104 ssente ezinaavaamu ziyambeko okuddukanya emirimu gy’ekkanisa, pulojekiti y’ekizimbe nayo baagitwala mu ofiisi ya Banja mu kiseera ekyo eyali afuuse Ssaabadinkoni w’e Luzira Obusabadinkoni obutwala ekkanisa ya St Stephens wabula era pulojekiti eno Banja nayo n’agigoba nga tawadde nsonga ntuufu ekyawaliriza Abakurisitayo okuddukira ewa Wilberforce Kityo Luwalira eyali omulabirizi w’e Namirembe ne bamuyitiramu n’abakkiriza era ku mukolo gw’okutema evvuunike Luwalira yajja ku kisaawe ky’e ssomero ekizimbe wekizimbibwa n’atema evvuunike pulojekiti n’etandika.
BANJA ANYIIGA: Ekikolwa ekyo waggulu, kyanyiiza nnyo Banja kubanga kigambibwa nti Banja ne banne ettaka ly’ekisaawe baali baagala kuliwa mugagga mulala y’aba alikulaakulanya so si Mereewooma ne banne era obutakkaanya wakati wa Banja ne Mmerewooma webwatandikira. Kigambibwa nti ettaka ly’ekisaawe abakulu baaliraba nga lisobola okuvaamu ensimbi ezisoba mu kawumbi kyokka Merewooma ne yeekika mu ddiiru eno era okuva olwo Banja ne Mereewooma ne batandika okwewalana.
BANJA ABIYINGIZAAMU NAABAGEREKA: Banja era yamera akasajja ku mutima olw’okuba Naabagereka yagaana okusabirako mu kkanisa y’Obusabandinkoni bw’e Luzira Banja gyeyali nga Ssaabadinkoni nga tanafuuka mulabirizi w’e Namirembe Banja kyeyataputa nti Meerewooma ye yawaganyaza Nabagereka era nti bino eby’obuyigirize n’ensonga endala zeyogedde ku nsonga ezaasooka okubatabula.
ENKIIKO EZAAGOBA MEREEWOOMA ZAATUULA NGA WA MUGENZI SSEKKADDE
Ensonda e Namirembe zitubuulidde nti enkiiko ezaateesa ku kuwumuza Mereewooma zaatuula mu maka g’eyali omulabirizi w’e Namirembe omugenzi Samuel Balagadde Ssekadde ku luguudo lw’e Entebe era abanene abakuba Mereewooma ne bassa kimu ne bamufulumya ekkanisa.
BASONZE KU MULABIRIZI EYASIGA ENSIGO Y’EKIBI MU KKANISA
Abamu ku baweereza e Namirembe balumirizza omugenzi Livingstone Mpalanyi Nkoyoyo eyali Ssabalabirizi nti ye yasiga ensigo y’ekibi eky’obutasoma mu kkanisa kubanga yalimba ennyumba ya Babisopu nga weyasoma ebitabo ne batuuka n’okumulonda ku bwa Ssaabalabirizi w’e kkanisa ya Uganda, kigambibwa nti Nkoyoyo yateeka omukono ku biwandiiko ebitunda ebimu by’obugagga omuli ettaka n’ebizimbi ne bitwalibwa olw’okuba n’obuyigirize obutono era ekkanisa erwanye okukomyawo ebimu ku bintu omuli eddwaliro ly’e Mengo eryali lirugenze.
Kigambibwa nti Nkoyoyo buli weyagendanga, yatambulanga n’omutaputa eyali amuvvununirira mu Luganda ensonga agitegeere bulungi olw’okuba yali Olungereza lumuzannya.
Wabula Nkoyoyo weyali akyali mulamu weyabuuzibwa nga ku diguli gyeyasoma yeewozangako nti buli ky’okola kola mangu bagende okukutegeera nga ky’oyagala okimalirizza.
ABAKURISITAAYO B’E KITEGOMBA BAWANDA MULIRO
Abakurisitaayo b’ekkanisa ya St John’s e Kitegomba nga bakulembeddwa omukubiriza w’ekkanisa eyo Steven Kayongo Merewooma gy’abadde yaakasindikibwa, bawakanyizza Banja okugoba Mereewooma olw’obutaba na buyigirize nti kikyamu kubanga ne Yesu Kristo teyalina buyigirize nga teyasoma naye yabuulira ebigambo eby’amagezi nga Merewooma bwakola, era n’okutuusa kati ensi ekyamusinza. Ebbanga ery’emyezi esatu gyamaze e Kitegomba abadde atandise pulojekiti ezaamanyi ezibadde zigenda okuyamba ku nnyingiza y’e kkanisa, balabudde Banja okukomya empalana gyalese mu buweereza bw’e Namirembe kubanga kijja kumunafuya mu buweereza.
MEREEWOOMA ADDUKIDDE WA KAGODO E MUKONO
Agava mu bulabirizi bw’e Mukono obukulemberwa Rt. Rev Enos Kitto Kagodo galaga nti Kagodo yakansizza Mereewooma era n’amuwa ogufo gw’obwa Ssaabakunzi w’obulabirizi bw’e Mukono wabula ebbaluwa emuwa omulimu teyanyonyodde buvunanyizibwa bwe naye kigambibwa nti yateereddwa ku lukiiko oluzimbi oluteekateeka pulaani y’okuzimba Lutikko y’e Mukono ennene ng’obuvunanyizibwa bwa Meereewooma bwakunoonya ssente mu bagagga kubanga kino akisobola bulungi kubanga gyabadde mu bulabirizi bw’e Namirembe e Kireka ne Kitegomba aleese ataddeyo pulojekiti ezaamanyi.
ABAKULISITAAYO BEEKUTUDDEMU: Kyokka abamu ku baweereza mu bulabirizi bw’e Mukono eky’okusembeza Mereewooma abamu tebakisanyukidde ne banenya Kagodo okusembeza omuntu gwategeddeko ebyafaayo ebibi ate ng’abaweereza abalina ebisanyizo, abasomye mu Mukono bangi abasobola okukola mu kifo kyeyawadde Mereewooma abamu kyebagamba nti Merewooma agenda kulabisa Obulabirizi bw’e Mukono nti kiddukiro ky’aboonoonyi.
MEEREWOOMA ENSONGA AZIKWASIZZA MUTONZI WE ASALEWO
Wabula Meerewooma bw’atuukiriddwa ONO BWINO okubaako ky’ayogera ku bimwogerwako ategeezezza nti byonna abirekedde mutonzi we y’aba asalawo ku nsonga ezimutambulirako omuli n’okujingirira ebiwandiiko atusindise wa Joshua Kasibo omukubirizza w’e Kkanisa ya St Stephens atukakasizza nti ekiruma Banja lwakuba Mereewooma mukakaalukanyi ng’obuzibu bwatandikira ku pulojekiti ku ssomero lya St Stephens Banja gyeyawakanya wabula Mereewooma n’amusinga amaanyi. Ku nsonga ya Merewooma obutaba na buyigirize Kasibo atugambye nti ebyo byonna byakwekwasa kubanga Mereewooma amaze ebbanga ddene mu buweereza era nga kizibu obutaba na biwandiiko bituufu.
